„Бришењето на македонскиот јазик и идентитет од извештајот за Македонија на Европскиот парламент, под диригирано влијание на Бугарија, претставува срамна страница во историјата на Европскиот парламент и тежок удар врз темелите на Европската унија, кои се изградени врз човекови права, еднаквост, недискриминација и почитување на различноста.“ – оценува Васил Стерјовски, лидерот на партијата Македонска алијанса за европска интеграција – МАЕИ, во интервју за весникот „Македонија“ од Канада.
Според него, наместо да биде заштитник на овие вредности, „Европскиот парламент се покажа со овој чин како заложник на балканските национализми и на уценувачката политика“. Стерјовски додава дека Европската слободна алијанса (ЕФА), политичката група која ги претставува малцинствата во Европскиот парламент и каде што членува МАЕИ, заедно со ОМО „Илинден“-Пирин, јавно реагирале на игнорирањето на македонскиот народ и предупредиле на опасноста од создавањето преседани, кои ги поттикнуваат негирањето и асимилацијата.
„Со попуштањето пред националистичките барања на Бугарија ЕУ испраќа погрешна порака дека нејзините институции се немоќни, или незаинтересирани да ги заштитат правата на малцинствата, особено македонското малцинство во Бугарија, кое со децении се соочува со системска дискриминација, политичко исклучување и целосно непостоење во правниот поредок на државата. Тоа не е само неправда, тоа е срам за демократијата.“- нагласува лидерот на Македонската алијанса за европска интеграција Стерјовски.
Тој посочува дека истите тие механизми на притисок Бугарија ги користи и во однос на Албанија, условувајќи го нејзиниот европски пат со барања, кои директно се насочени кон негирање на македонскиот идентитет, јазик и културно наследство. „Наместо европски дух и соработка, се случуваат обиди за политичка уцена и асимилација. Но, Македонците не се народ без глас и нема да бидат, без разлика каде живеат. Нашата борба за правда, еднаквост и признавање ќе продолжи со уште поголема решеност, на секое можно рамниште, од локално, до европско.“ – порачува Стерјовски во интервјуто пред неговата посета на Македонците во Канада по повод големиот празник Илинден.