Поради продолжување на конфликтот на Блискиот Исток помеѓу САД и Иран, референтната цена на природниот гас на европскиот пазар (Dutch TTF) во понеделникот надмина 70 евра за мегават-час, откако обновените судири повторно го отворија прашањето за можни проблеми со извозот на течен природен гас (ЛНГ) од Персискиот Залив, пренесува Фактор

Цената на TTF за испорака во октомври 2026 година за време на тргувањето достигна максимум од 70,85 евра за мегават-час, според податоците на „ICE“. Новите тензии уследија откако американските сили во неделата нападнаа ирански ракетни лансери во близина на Ормускиот Проток, а Иран одговори со истрелување проектили врз американските сили во Јордан.

Ситуацијата е особено значајна за енергетскиот пазар бидејќи низ Ормускиот Проток во вообичаени околности минува околу една петтина од светската трговија со течен природен гас.

Новите проблеми со снабдувањето доаѓаат токму во моментот кога Европа се обидува да ги обнови залихите на гас пред зимата.

Складиштата во Европската Унија се пополнети со 64,7 проценти, покажуваат податоците на „Gas Infrastructure Europe“, што е под историското ниво за овој период од годината.

Високите цени дополнително го забавија полнењето на складиштата во одделни држави.

Поради тоа расте загриженоста дека Холандија и Германија до 1 ноември нема да успеат да ги достигнат целите за пополнетост од 80, односно 70 проценти.

Пониската пополнетост на складиштата сама по себе не значи дека Европа ќе нема доволно гас во текот на зимата, но ја зголемува нејзината ранливост на ненадејни промени на цените и нови проблеми во глобалното снабдување.

Европската Унија директно увезува релативно мал дел од гасот од Блискиот Исток. Катар во текот на 2025 година учествувал со 3,7 проценти во вкупниот увоз на гас во ЕУ.

Сепак, главниот проблем е глобалната конкуренција за течен природен гас. Доколку нарушувањата во Персискиот Залив потраат, европските купувачи би можеле поагресивно да се надметнуваат со купувачите од Азија за расположливите количества, што дополнително би ја зголемило цената.

Според проценката на „Goldman Sachs“, таков сценарио би можело да ги приближи цените на големо до границата од 100 евра за мегават-час.

Аналитичарките на „Goldman Sachs“, Саманта Дарт и Лаура Сир, проценуваат дека доколку извозот на енергенти од Блискиот Исток се нормализира дури постепено во текот на 2027 година, цената на TTF за декември 2026 година веројатно ќе мора да премине 100 евра за мегават-час.