Одбраната во случајот со судијата Ѓоко Ристов денеска почна со изведување на свои сведоци. Прв пред судот сведочеше адвокатот кој ги застапува родителите на Ристов, Здравко и Донка, а кој бил присутен во нивната куќа во Неготино за време на претресот при кој беа пронајдени пари скриени во ѕид.
Сведокот Александар Варела раскажа дека на 17-ти бил повикан од братот на Ристов да оди во Неготино, бидејќи требало да се изврши претрес во куќата. Според неговото сведочење, полицијата детално ја пребарувала куќата – отворала шифоњери, фиоки, просторот под креветите, оставата, бочви со вино и ракија, фрижидер за длабоко замрзнување, гаражата и резервните гуми, како и просторот надвор околу дрвата и печката за ракија.
Претресот продолжил и на катот, каде што полицајците пребарувале четири соби, а во една од нив детално го проверувале и оџакот. Се користела дополнителна опрема за снимање, а пребарувале и со боцкање на земјата до длабочина од околу половина метар.
Сведокот рече дека претресот продолжил и следниот ден. Особено внимание било посветено на кујната, каде полицајците се посомневале во плочките поради тап звук при удирање.
„Плочка при слабо удирање падна, не била добро залепена. Ги извадија петте што паднаа, па уште толку“, сведочеше адвокатот.
Во тој момент, според неговото сведочење, бил присутен и сопственикот на куќата Здравко, кој им рекол на полицајците да не ги кршат плочките бидејќи повторно ќе треба да ги лепи.
Кога била отстранета една од плочките, зад неа бил откриен отвор од околу пет сантиметри. Сведокот кажа дека Здравко, откако бил прашан што има таму, одговорил со зборовите „ај, бидна“. Потоа, кога полицаецот го прашал дали станува збор за динамит или дрога, според сведочењето, Здравко рекол: „Нема потреба, пари се“.
Полицајците со камерата влегле низ отворот и забележале сребрена фолија во внатрешноста на ѕидот. Здравко бил тргнат на страна, а полицајците почнале да ги вадат пакувањата.
Според сведокот, биле пронајдени 13 пакувања со пари, поставени во надолжна линија, поради што нивното вадење било отежнато и морало да се крши дел од ѕидот.
„Парите ги броеја на тепихот, немаа доволно хартиени ќеси да ги сместат“, рече сведокот, додавајќи дека дел од пакувањата биле завиткани во проѕирна фолија и целофан.
Тој сведочеше и за начинот на кој биле отворани пакувањата, тврдејќи дека фолиите и целофанот биле кинети и гмечени и дека не биле раздвојувани на начин на кој би се зачувала нивната чистота. Парите, според него, биле ставани во кеси, а фолиите одделно.
Сведокот пред судот кажа дека подоцна го прашал Здравко зошто не му кажал дека парите се скриени во ѕидот.
„Ми рече: ‘Не знаев дека ќе одат толку далеку, не сакав да знаат децата’“, сведочеше адвокатот.
На прашањето што ќе се случи со парите, според неговото сведочење, Здравко одговорил: „Што сакаат нека прават, мои се парите“.
Сведокот кажа дека ова било внесено и во записникот од претресот. Според него, Здравко самиот му кажал дека сумата била над 350.000, иако претходно не му кажал како адвокат дека има толкава сума пари.
Во текот на сведочењето беше отворено и прашањето за потеклото на цементот и градежните зафати во куќата. Обвинителката Искра го праша сведокот за разликите во изјавите поврзани со тоа кој вршел градежни работи. Сведокот посочи дека Здравко кажал оти цементот бил негов и дека тој лепел плочки, додека во записникот, според обвинителката, стоело дека неговиот син вршел градежни зафати.
Обвинителката го праша и дали Здравко пред претресот бил прашан дали има нешто да пријави, на што тој одговорил дека нема.
Сведокот, кој во текот на претресот повеќепати се повикуваше на она што го видел и слушнал лично, оцени и дека просторијата во која биле пронајдени парите не била обезбедена на начин што би спречил движење низ неа.
Претресот, според неговото сведочење, завршил околу 19 часот, по што информациите за пронајдените пари веднаш се појавиле во медиумите.
Одбраната продолжува со изведување на своите докази и сведоци. На следното рочиште треба да сведочат Фехми Стафа, кој е во затвор поради барање поткуп токму за судијата Ристов, и Љупчо Пецов Ѓаволот, од кого биле барани парите за да не оди во притвор.