По повеќе од три години судење, утре во Хаг треба да биде изречена првостепената пресуда за Хашим Тачи, Кадри Весели, Реџеп Селими и Јакуп Красниќи, поранешни високи команданти на УЧК. Четворицата се обвинети за воени злосторства и злосторства против човештвото, меѓу кои убиства, тортура, прогон, незаконско затворање и присилни исчезнувања. Во процесот сведочеа 134 лица, а беа разгледувани илјадници доказни материјали.
Пресудата во Косово се очекува со големо внимание. Во Приштина деновиве се одржуваа протести и собири за поддршка на четворицата обвинети, а во пресрет на одлуката се зголемени стравувањата од политички и меѓуетнички тензии.
Пресудата во Хаг ќе биде јавно изречена утре во 10 часот и ќе може да се следи во живо преку каналите на Специјализираните совети за Косово.
Тачи, Весели, Селими и Красниќи се во притвор во Хаг од 2020 година. Утрешната пресуда ќе биде првостепена, и странките имаат право на жалба.
Случувањата во Косово се следат внимателно и во Македонија. Засега нема информации за конкретна закана или нарушување на безбедноста како директна последица од пресудата.