Европската Унија сè поодлучно се спротивставува на зависноста од Starlink – технологијата на SpaceX во сопственост на Илон Маск. Бројни влади и компании во Европа ги засилуваат напорите за алтернативи, и тоа на најмалку пет фронта.
1. Подготовка на конкуренција
Претседателката на Европската комисија, Урсула фон дер Лајен, даде јавна поддршка на договорот меѓу Airbus, Leonardo и Thales за спојување на нивните сателитски и вселенски операции во еден субјект со работно име Bromo. Целта е да се создаде европски конкурент на SpaceX преку обединување на производството на сателити, копнените системи и вселенските услуги. Дури и ако регулаторите го одобрат спојувањето, ќе бидат потребни години за да се достигне обемот на компанијата на Маск.
2. Блокирање на радиофреквенциите
Европската комисија оваа година започна со резервирање на клучни делови од сателитскиот спектар за европски субјекти. Овие фреквенции се особено погодни за директна поврзаност до мобилни телефони. Потегот наиде на остар отпор од SpaceX.
„Предлогот создава значителна веројатност дека Европејците ќе останат без сателитски услуги кои функционираат директно до уредите, или пак дека новите европски операции ќе предизвикаат проблеми со пречки во глобални рамки – вклучително и за службите за итни случаи, како што се оние во Украина“, предупредија од SpaceX.
3. Изградба на сопствена сателитска мрежа
Унијата развива сопствена констелација наречена IRIS², која треба да обезбеди безбедни владини комуникации и широкопојасен интернет. Проектот сериозно доцни – првично планиран за 2024/2027, сега првите сателити се очекуваат во 2029, а услугите најрано во 2030 година. Во меѓувреме Starlink има повеќе од 11.000 сателити во орбита.
4. Алтернатива за Украина
Украинските сили неодамна се соочија со ограничувања на брзината на Starlink. Маск објави дека земјата ги прекршува условите за користење бидејќи го користи за офанзивни напади со дронови. Поради тоа се зголеми притисокот Брисел да ѝ овозможи на Украина пристап до постоечкиот систем Govsatcom, кој стана оперативен на почетокот на 2026 година. Преговорите започнаа во март, но сè уште нема конкретни резултати.
5. Правен притисок
Во Брисел се подготвуваат најмалку три регулаторни иницијативи што би можеле да го отежнат ширењето на Starlink. Тие вклучуваат построги правила за безбедност на синџирот на снабдување, чување податоци, законско пресретнување на комуникациите, како и обврски поврзани со сајбер-безбедност, вселенски отпад и заштита на животната средина.
Овие мерки предизвикаа остра реакција од Стејт департментот на САД, кој ги оцени како „неприфатливи регулаторни оптоварувања“ насочени кон американските компании и навести можна одмазда.