Словенечка или австриска банка кои оперираат во земјава купувачи на Алта банка – Битола?!

Словенечка или австриска банка кои оперираат во земјава се споменуваат како потенцијални купувачи на „Алта банка“ во Битола, се непотврдените информации до кои дојде Фактор. Премиерот Христијан Мицкоски денеска изјави дека очекува банката да добие нов сопственик и да продолжи со работа, а аукцијата за продажба на акциите да биде закажана кон крајот на ноември или почетокот на декември. Одговарајќи на новинарски прашања при посетата на Охрид, Мицкоски изрази уверување дека ќе се најде решение со кое ќе се избегне стечај на банката.

• „Ќе ја спасиме банката. Тоа е многу важно и за доверителите, но и за луѓето што се во, би рекол, некаква релација со Алта банката“, изјави премиерот.

Тој посочи дека се очекува новиот сопственик да биде финансиска институција, односно банка, со што би се обезбедил континуитет во работењето.

Аукција кон крајот на ноември или почетокот на декември

Мицкоски ја објасни и постапката што треба да претходи на продажбата на акциите. Според него, веќе истекол тридневниот рок за информирање на регулаторот во Србија, а во тек е десетдневниот рок во кој треба да се даде согласност за Народната банка да може преку аукција да ги отуѓи акциите. Потоа следува постапка за лиценцирање на потенцијалните понудувачи, за која е предвиден рок од пет дена.

• „Поминаа оние три дена во кои се информира регулаторот во Србија, течат оние 10 дена во кои тие треба да дадат право Народната банка преку аукција да ги оттуѓи акциите. Потоа следуваат пет дена на лиценцирање потенцијални понудувачи и очекувам кон крајот на месецот, почетокот на идниот, да биде закажана аукцијата“, изјави Мицкоски.

Кој ќе биде новиот сопственик?

Како можни купувачи се споменуваат банки од Словенија и Австрија, кои работат во земјава но засега нема официјална потврда за нивниот идентитет, ниту информација дека е поднесена формална понуда. Премиерот не соопшти која финансиска институција би можела да ја преземе банката, ниту по која цена би се продавале акциите. Тој нагласи дека очекува процесот да заврши со преземање на банката од нов сопственик, наместо со стечај.

Во однос на можноста за истрага за случувањата поврзани со банката, Мицкоски рече дека нема ништо против Обвинителството да отвори предмет и да ги испита околностите. Случајот со „Алта банка“ во Битола се најде во фокусот на јавноста по проблемите поврзани со нејзиниот сопственик во Србија, кои отворија прашања за понатамошното работење на македонската банка. Засега клучно останува дали во најавените рокови ќе биде спроведена аукцијата и која банка ќе достави понуда за преземање на сопственоста.