Од денеска до 11 септември литар евродизел во Србија ќе чини максимум 234 динари или точно две евра, што претставува историски рекорд.
Со овој скок е надминат претходниот историски максимум од 222 динари за литар забележан во ноември 2022 година за време на тогашната глобална енергетска криза. Во споредба со тој период, дизелот сега е поскап за 12 динари или за околу 5,4 проценти.
Бензинот, пак, е точно на нивото на рекордот од јули 2022 година – 205 динари за литар.
Најновата цена на дизелот кај северниот сосед на Македонија е највисока во поранешна Југославија, а во регионот поскап дизел се продава само во Албанија, кадешто еден литар чини меѓу 2,24 и 2,37 евра.
Во Хрватска дизелот во моментов се продава за околу 1,92 евра за литар, во Црна Гора за 1,87 евра, во Босна и Херцеговина меѓу 1,63 и 1,72 евра, а во регионот најевтин е во Македонија, кадешто најмалку до понеделник ќе се продава за 95 денари или 1,54 евра за еден литар.