Конфедерацијата на слободни синдикати на Македонија започнува со постапка за прифаќање на понудата за зголемување на платите на административните службеници во рок од 25 до 26 месеци почнувајќи од 01.03.2026 година завршувајќи до 01.03.2028 година, и заедно со линеарното покачување дополнително ќе се покачуваат платите по 8% секоја година, за кој веќе е започаната подготовката на поединечни колективни договори, со цел зголемувањето на платите во администрацијата да стане реалност без да се изгуби времето на работниците, се вели во соопштението од КСС.
Конфедерацијата на слободни синдикати уште од првиот момент ја прифати понудата кога таа беше изнесена, без опструкции, без калкулации и без злоупотреба на работниците. Нашиот став беше и останува јасен – секоја реална можност за подобрување на материјалната состојба на вработените треба да се искористи веднаш.
Во изминатиот период јавноста е сведок на обиди за создавање лажна слика дека не постоела реална можност за покачување на платите и дека некој друг е виновен за изгубеното време на работниците. Вистината е поинаква и мора јасно да се каже.
Понуда за покачување на платите постоеше и беше ставена на маса. Наместо таа да биде прифатена и да се оди кон конкретна реализација во интерес на работниците, процесот беше свесно опструиран од страна на УПОЗ и ССМ. Поради ваквиот пристап, работниците изгубија неколку драгоцени денови и месеци, не поради суштинска борба за права, туку поради дневнополитички популизам и обиди за собирање поени преку протести без резултат.
Под притисок на преговорите на КСС и САДУ вистината излегува на виделина и она што ССМ сакаат да го прикажат како неуспех, е успех за работниците. Како може да се каже дека социјалниот дијалог не функционира, кога КСС преку социјален дијалог успеа да се зголемат платите во образование, здравство, полиција, а во одбараната да се почитува колективниот договор и да се исплаќаат сите додатоци на плата!
Вистинската синдикална борба се води со одговорност, искреност и конкретни резултати за работниците, а не со спинови и селективна „загриженост“ што се појавува само кога тоа одговара на нечии интереси, велат од КСС и додаваат дека ќе продолжи да дејствува во интерес на работниците со дела, а не со празни зборови.