Реалниот раст на бруто општествениот производ од 3,8 проценти во третиот квартал годинава, според Државниот завод за статистика, ја искачи Македонија на третото место во Европа, веднаш зад Ирска и Данска.
„Ова претставува дополнително забрзување на економската активност, по растот од 2,9 отсто во првиот и 3,5 отсто во вториот квартал годинава. Притоа, растот од 3,8 проценти е еден од највисоките во последните неколку години. Во споредба со земјите од регионот и од Европската унија, согласно со податоците за третиот квартал за 2025 година, Македонија е на третото место по растот на БДП, при што повисок раст е забележан само во Ирска и во Данска. Ако споредуваме со земјите од регионот, за третиот квартал од 2025 година, растот во Србија изнесува 2 проценти, во Црна Гора 3,1 отсто, во Хрватска 2,3 отсто, во Бугарија 3,1 отсто, во Романија 1,2 отсто. Кумулативно, растот во првите три квартали годинава изнесува 3,4 проценти“, изјави министерката за финансии Гордана Димитриеска-Кочоска.
Главниот двигател на растот во третото тримесечје се бруто-инвестициите, кои се зголемени за 30,6 проценти, како резултат на силниот раст на инвестициите во основни средства, истакна таа.
Придонес за растот на БДП има и финалната потрошувачка со раст од 1,8 отсто.
Растот во градежништвото е 21 отсто, кај услугите 2,9 отсто, информациите и комуникациите од 7,4 отсто, стручните, научните и техничките дејности од 6,1 отсто, а во трговијата и транспортот од 2,6 отсто.
Индустријата бележи раст од 1,3 проценти, преработувачката индустрија 2,5 %отсто, а забележителен е и растот на земјоделството од 4 отсто, нагласува Димитриеска-Кочоска.