Државниот пазарен инспекторат го доставил извештајот од извршените инспекции до Министерството за економија од кој ќе зависи дали по Велигден ќе има нови мерки против поскапувањата како намалување на ДДВ и ограничување на профитната маржа на трговците. Од пазарниот инспекторат потврдија за Телма дека извештајот до адресата на министерството е испратен минатата недела, кое треба да ги обработи податоците и да ги испрати до Владата која ќе ги разгледува на наредната седница во вторник.
Оттаму велат дека направени се над 140 надзори и опфатени биле над 800 продажни места. Се извршиле инспекции на производители, увозници, дистрибутери и локални поголеми маркети и ланци на маркети. Се проверувале цените на основните прехранбени прозиводи, средства за лична хигиена, средства за чистење, како и детска и бебешка храна и други детски производи.
Извештајот е изработен на барање на премиерот Христијан Мицкоски и врз основа на тоа ќе биде познато дали има разлика во цените на основните прехранбени производи, односно дали и колку тие поскапеле на почетокот на април, споредено со февруари годинава.
Глобалните случувања со конфликтот на Блискиот исток се одразија и на домашните цени. Пред Велигден поскапеа поскапеа јајцата, а со нова повисока цена се продава и зејтинот. Поскапување се забележува кај речиси сите производи, но најголемо е кај овошјето.
Сето тоа резултираше и со повисока инфлација. Иако, од почетокот на годинава почна да се намалува, во март Државниот завод за статистика измери речиси 5 отсто инфлација во споредба со истиот месец лани. Кај цените на мало пак има зголемување од 3, 4 отсто.
Мицкоски најави дека на следната владина седница ќе го имаат извештајот и компаративната анализа и ќе резгираат врз основа на неа. Засега остануваат мерките за намалување на ДДВ за бензините и дизел од 18 на 10 проценти и одлуката за усогласување на акцизите, со која Регулаторната комисија за енергетика може да постапува.
Тој притоа изјави дека очекува на следната седница на РКЕ да се донесе одлука со која цената на дизелот ќе се намали за 2 и пол денари, а на бензините Еуросупер 95 и Еуросупер 98 за 1 ипол денар. Од ССМ укажаа дека Владата и досега требало да донесе мерки за да се заштитат потрошувачите. Од опозициската СДСМ реагираа дека веќе 45 дена цените се на високо ниво, без ниту една сериозна интервенција од владата.