Почетокот на годината е охрабрувачки, според економските показатели. Владата и бизнис-секторот се фокусирани на стабилноста, заштитата на стандардот и на долгорочниот раст, истакна премиерот Христијан Мицкоски. Според него, засега, како Влада, добро се справуваат со состојбата во економијата и преземаат мерки за справување со глобалните предизвици. Премиерот истакна дека нема ценовен шок и снабдувањето со нафта и нафтени деривати не е доведено во прашање, а компаниите снабдувачи имаат доволно резерви.
- Ценам дека македонската економија се движи кон состојба на консолидирање, се разбира дека нема да запрат предизвиците, тие ќе продолжат, но ние се обидуваме да ги антиципираме и да изнаоѓаме решенија за тие предизвици. Колку е државата посилна толку и бизнисот повеќе вреди. Колку е посилен бизнисот толку и државата е посилна. Затоа е многу важно да имаме ликвиден бизнис, економија што навремено ќе ги врши обврските кон државата и кон буџетот. Со исполнувањето на тие обврски и со ликвиден буџет, ние ќе може да имаме повеќе капитални инвестиции, повеќе инвестиции во земјоделството, здравството, образованието, повисоки пензии, повисоки плати… Критиките и аргументите ќе ги анализираме и таму каде што можеме да бидеме подобри, ќе се потрудиме во следната година да бидеме подобри. Задоволен сум од фактот што е двоцифрен растот на процентот на оние компании што се задоволни од бизнис- климата и дека планираат да ја прошират својата инвестиција. Се разбира дека ќе имаме предизвици, но ние, како Влада, ќе ги решиме тие предизвици, бидејќи со секое евро вложено во земјата, растат имотите на компаниите, а расте и економијата – изјави Мицкоски.
Премиерот посочи дека и покрај сите предизвици, нема ценовен шок и стабилноста во снабдувањето со нафта и нафтени деривати никогаш не била доведена во прашање.
- Во моментов, поголем е притисокот од граѓаните од соседните земји што доаѓаат кај нас во пограничните региони да ги наполнат резервоарите на своите возила. Но, и покрај тој притисок, имаме доволно резерви и компаниите што вршат снабдување на пазарот имаат доволно резерви. Во делот на инфлацијата, во февруари годинава во однос на февруари лани таа порасна само за 2,9 отсто и имаме најниска инфлација во регионот – изјави Мицкоски.
Според премиерот, сите индикатори се позитивни и главен приоритет на Владата ќе биде зголемувањето на стандардот на граѓаните. Мицкоски рече дека има јасни пораки и аргументи, кои ќе ги изнесе на состанокот со трговците и со претставниците на маркетите.
- Со синџирите маркети ќе разговараме за предизвиците со кои се соочуваат, сè со цел да не дојде до драматично зголемување на инфлацијата, односно трошоците за живот. Во таа насока, ќе споменам уште еден позитивен параметар, а тоа е намалување на трошоците на мало за 1,6 отсто во февруари, што значи дека се смирува и базичната инфлација – рече Мицкоски.
Премиерот очекува, во овие предизвикувачки услови, сите да се однесуваме одговорно и во заштита на стандардот на граѓаните. Во однос на барањата на другите политички партии за преземање мерки за цените на горивата и за заштита на стандардот на граѓаните, Мицкоски рече дека во овој момент нема предизвик што би го загрозил нормалното функционирање на системот. Тој рече дека предлозите од опозицијата и од другите политички партии Владата ќе ги земе предвид.