Двајца жители на Скопје се приведени вчера по полноќ на улицата „Индира Ганди“, откако едниот од нив фрлил кеса со марихуана, а при полициска интервенција нападнал полициски службеник, соопшти Министерството за внатрешни работи.
Според МВР, околу 1:30 часот вчера, биле лишени од слобода М.К. (30) и А.М. (40), двајцата од Скопје.
Полициските службеници го забележале М.К. како фрла кеса со марихуана. При обид да извршат службени проверки, тој, според МВР, нападнал полициски службеник и се обидел да избега, но бил совладан и приведен.
Во меѓувреме, А.М., според полицијата, се обидел да ги спречи полициските службеници да го приведат М.К., по што и тој бил лишен од слобода.
Од МВР информираат дека по целосно документирање на случајот ќе биде поднесен соодветен поднесок до надлежното обвинителство.