Натаму порталот пуишува: „Јавен обвинител од Основното јавно обвинителство Гевгелија изврши увид на лице место и издаде повеќе наредби за обезбедување докази со цел да се испитаат причините за настанот. Издадена е наредба за обдукција на телата на починатите, а обезбедени се и снимки од видео надзор. Првичните индиции упатуваат на убиство и самоубиство, меѓутоа настанот ќе биде во целост испитан“, велат од Обвинителството.
Според сознанијата на Скопје1, судот претходно му изрекол мерки за заштита од семејно насилство на 21-годишникот, вклучително и забрана да ѝ се приближува и да ја вознемирува малолетничката. Трагедијата се случила додека овие мерки сè уште биле во сила.
На 16 октомври Основното јавно обвинителство Гевгелија примило пријава за загрозување на сигурноста на девојката. Според информациите до кои дојде редакцијата, обвинителството започнало со постапување, биле определени датуми за распит на пријавителката и пријавениот, а биле дадени и наредби за вештачења.
Паралелно со оваа постапка, малолетничката водела и граѓанска постапка за заштита од семејно насилство, во која биле изречени заштитните мерки.
Според извори запознаени со случајот, постојат сомнежи дека 21-годишникот ја чекал девојката пред теретана во Гевгелија, по што насилно ја внел во автомобил и ја однел во правец на Богданци.
Овие информации засега не се официјално потврдени. Обвинителството соопшти дека се обезбедени снимки од видеонадзор, но не прецизираше што е забележано на нив.
Претходно, МВР потврди дека Виктор Г. бил лишен од слобода по пријава дека на 30 септември физички ја нападнал својата 17-годишна девојка во неговиот дом. За случајот бил известен јавен обвинител.
Девојката им раскажувала на блиски пријатели за закани и за наводен напад со нож, од кој, според нејзините тврдења, успеала да избега преку прозорец.
На 3 ноември, во 18:40 часот, полицијата добила пријава за опожарен автомобил кај местото „Ичева чешма“ во Богданци. Покрај возилото било пронајдено безживотното тело на 21-годишникот, а по локализирањето на пожарот во автомобилот било откриено уште едно опожарено тело.
По наредба на обвинител, телата се предадени на обдукција за утврдување на причините за смртта и официјална идентификација.
Иако првичните индиции на Обвинителството упатуваат на убиство и самоубиство, конечните околности сè уште се утврдуваат. Засега не е официјално соопштено кој го предизвикал пожарот, како настапила смртта на двете лица и што точно се случувало непосредно пред трагедијата.
Случајот отвора и прашања за спроведувањето на претходно изречените судски мерки, особено дали надлежните институции имале сознанија за евентуално нивно прекршување и дали биле преземени сите предвидени мерки за заштита на малолетничката. објави Скопје1.мк