На едната од најреномираните интервенциско-кардиолошки сцени во светот – Gulf PCR 2025 во Дубаи, Македонија доби вистински амбасадор на струката.
Д-р Виолета Мојсовска Наумоска, докторанд на медицински науки од областа интервентната кардиологија од Кардиолошкиот центар „Св. Стефан“ – Охрид, приредила настап кој привлекол внимание кај меѓународната кардиолошка заедница.
Со две високостручни предавања, „All Things Vascular“ и „Imaging to the Rescue“, д-р Мојсовска Наумоска ги презентирала најновите техники и пристапи во третманот на комплицирани васкуларни и периферни артериски лезии. Нејзиниот настап бил проследен со голем интерес, бројни прашања и дискусии, при што публиката ја истакнала како еден од највпечатливите говорници на годинешното издание на конгресот.
Особен фокус привлекла нејзината презентација на иновативниот пристап преку тибијалната артерија за третман на долги CTO лезии на површинската феморална артерија – тема што предизвикала интерес кај водечки експерти поради својата современост и практична вредност.
Со своето учество, д-р Мојсовска Наумоска не само што ја претставила Македонија на престижна светска сцена, туку и покажала дека Охридската кардиоваскуларна школа рамноправно чекори со најголемите имиња од Европа, Блискиот Исток и САД.
Gulf PCR уште еднаш докажа дека е конгрес каде се слави науката – а оваа година, дел од оваа научна елита беше и нашата д-р Виолета Мојсовска Наумоска, информираат нејзини колеги.