Екс-ракометар и бизнисмен остро реагира на изјавите на поранешните министерки од СДСМ, Бисера Костадиновска и Јована Тренчевска, кои повторно ја нападнаа одлуката за Скопје – Европски град на културата 2028 и проектот „Скопје 2014“.
Клинчаров ги обвини поранешните функционерки и „пуленките на Зоран Заев“ дека кариерите ги граделе врз „плукање и труење“ и дека во периодот од 2017 до 2024 година СДСМ не само што не допринел со ништо кон проектот, туку активно го стигматизирал и политички го сатанизирал.
Како позитивен пример, авторот ја посочува неодамнешната посета на поранешната тенисерка Јелена Докиќ, поранешна четврта играчка на светот, авторка на бестселерите „Unbreakable“ и „Fearless“, како и на документарниот филм „Unbreakable“. Докиќ, која моментално е ТВ презентер на австралиската Channel 9 и домаќин на Australian Open, во последниве денови престојувала во Скопје и Охрид.
„Ете, Јелена се сликала со многу објекти и знаменитости од тој проект, го промовира Скопје, Охрид, Македонија… За два дена, преку 16-17.000 лајкови, 300 коментари, 600 споделувања, милион прегледи“, се вели во објавата на Клинчаров.
Според екс-ракометарот, ваквите посети од познати личности и обични туристи носат реална економска корист за земјата – ноќевања, угостителство, туристичка такса и даночни приходи. Тој додава дека преку „верижниот ефект“ на социјалните мрежи, следбениците на овие гости често се поттикнуваат и самите да ја посетат Македонија.
Авторот критикува дека СДСМ во седумгодишниот мандат не само што не создал нови капитални проекти, туку ги стопирал веќе започнатите (како двете факултетски згради и објектот на НБРМ), не ги одржувал постоечките и намерно ги оставил да пропаѓаат од политички причини. Сега, според него, државата ќе мора да троши значителни средства за реконструкција и реставрација на запуштените објекти.
Објавата завршува со директна порака до Бисера Костадиновска и Јована Тренчевска:
„Следниот пат кога Бисера и Јована ќе сакаат да паламудат околу вложување во инфраструктурата… прво да ја чукнат главата во ѕид 3-4 пати, сабајлечки, да се погледнат во огледало, да си одговорат самите на себе што тие две сработија за 7 години… па дури после да излегуваат да критикуваат.“
Реакцијата на поранешниот ракометар доаѓа во време на актуелната политичка дебата околу културната политика, инвестициите во инфраструктура и оценките за наследството од проектот „Скопје 2014“.