На синоќешниот собир во Арачиново лидерот на ДУИ рече дека Албанците имаат право да ја водат државата бидејќи се нераскинлив дел од неа.
„„Ние не ја носиме државата со себе, ние имаме право да ја водиме, тоа ни припаѓа! Албанците се над 30 отсто, живеат континуирано на своите огништа и се нераскинлив дел од државноста!“, вели Ахмети.
Говорејќи за обидите за поделба меѓу Албанците и нивно заменување со т.н. „чесни Албанци“, Ахмети предупредил на враќање на опасни идеологии и во тој контекст рече дека Албанците нема да дозволат повторно да бидат „слуги во сопствениот дом“:
„Нѐ држеа потиснати, исплашени, протерани – но тоа заврши. Денес Албанците имаат три универзитети и илјадници професионални кадри. Ниту една сила не може да ја сопре оваа реалност! Оваа држава повеќе не може да се води од само една страна. Не е во ничиј интерес да се загрози соживотот. Оние што му служат на злото, не можат да бидат наши партнери!“.
На крајот од својот говор тој повикал на мир, обединета Европа и слободно движење, спротивставувајќи се на идеите за големи држави со визија за регионална интеграција:
„Ние не бараме Голема Албанија, ниту Голема Србија, ниту Голема Бугарија – туку Голема Европа без граници, како што направија Германија и Франција. Западен Балкан обединет во Брисел, во мир и конечно помирување!“, рече лидерот на ДУИ, како што пренесе „360 степени“.