„За да дојдат повторно на власт од Националната алијанса за интеграција (НАИ) се подготвени да поттикнат убиство меѓу народот! Клеветите, измамите и манипулациите ним им се единствено средство за преживување, дури и преку поттикнување омраза меѓу граѓаните и меѓуетнички судир сè до дестабилизација на земјата!“ – со ова жестоко обвинување Аднан Азизи, пратеник во Собранието на Македонија и шеф на Централниот изборен штаб на Вреди, ги нападна ДУИ на Али Ахмети и другите партии, кои се дел од опозициската коалиција Национална алијанса за интеграција. Ова го објави информативниот портал на албански јазик „Фол“.
Порталот ја пренесува пораката на Азизи до Националната алијанса за интеграција на ДУИ и Али Ахмети, објавена на фејсбук: „Националната алијанса за интеграција на зулумот ја губи секојдневно поддршката на терен. Секој ден се соочуваат со напуштање на структурите, нивните членови и поддржувачи постојано си заминуваат, додека Вреди расте од ден на ден. Овој факт им предизвикува паника и стрес, поради што целосно ја изгубија својата ориентација.“
„Затоа, наместо да се движат кон иднината, зборувајќи за идеи, конкретни планови и проекти, тие се занимаваат со клевети и измами. Сега се плашат од следната загуба, што ќе ги потопи засекогаш, откако им излезе на површина секој национален неуспех, дека 22 години не направиле ништо за Албанците и за народот, туку само за себе.“
„Поради сите овие околности, тие ги гледаат клеветите, измамите, манипулациите како единствено средство за преживување, дури и преку поттикнување омраза меѓу граѓаните и меѓуетнички судир сè до дестабилизација на земјата. Тие продолжуваат со старите југословенски политики: за парче власт се подготвени да поттикнат убиство меѓу народот!“
„Залудно ви е, веќе е запечатен вашиот политички крај!“ – објави Аднани Азизи на општествената мрежа фејсбук, пренесе „Фол“.