Македонија

Божиновска: Ќе нема ценовни шокови за граѓаните

Владата работи на сигурно снабдување со струја

Министерката за енергетика, рударство и минерални суровини Сања Божиновска посочува дека Владата работи на обезбедување сигурно снабдување со електрична енергија и спречување на нагли ценовни промени.

Владата прави сѐ за да нема ценовни шокови и ќе преземе сѐ за секогаш да има електрична енергија за граѓаните и сигурност во снабдувањето, изјави Божиновска во интервју за МИА.

Таа учествуваше на Вториот министерски самит за енергетика во Белград заедно со колегите од Грција, Бугарија и Србија и испрати порака дека Македонија подготвена ќе ја дочека претстојната зимска сезона.

Божиновска се осврна на глобалните предизвици, нагласувајќи дека некои работи не можат да се контролираат, но државата ќе направи сѐ производството да биде на одлично ниво.

Во врска со евтината тарифа, таа информира дека ќе има состанок со претседателот на Регулаторната комисија за енергетика, која веќе ги прави потребните анализи.

– Претседателот на РКЕ кажа дека веќе прават некои анализи, па ќе видиме, бидејќи во државата имаме голем број фотоволтаици. Ќе се состанам со претседателот и ќе видиме што може да се направи сѐ за доброто на граѓаните – подвлекува министерката.

На самитот во Белград главниот акцент беше ставен на регионалната соработка и безбедноста на снабдувањето.

– Да, го одржавме вториот самит на кој присуствувавме ние, Република Грција, Република Србија и Република Бугарија. Министерскиот состанок беше посветен на регионалната енергетска соработка и главната порака беше токму тоа – дека треба да бидеме здружени, дека тоа е клучно, многу важно и дека придонесува за безбедноста и сигурноста во снабдувањето, особено во услови како сегашните, кога, како што знаете, имаме две војни – рече Божиновска.

Таа посочи дека се разговарало за проекти што преминуваат од планови во реализација, вклучувајќи го Вертикалниот гасен коридор, пристапот до LNG капацитетите преку Александруполи и диверзификацијата на изворите.

– Од Белград испративме јасна порака: енергетската сигурност на регионот ја градиме заедно, преку конкретни проекти и посилно поврзување – истакна министерката.

За Македонија особено значајни се интерконекторите со Грција и Србија, како и вклучувањето во Вертикалниот гасен коридор.

Божиновска информира и дека на маргините на самитот остварила билатерална средба со бугарската министерка Ива Петрова, со фокус на батериските системи, поврзувањето на пазарите и мерките против енергетска сиромаштија.

Во однос на подготовката за зимата рече:

– Во разговор со претставниците на ЕСМ, моментно имаме 40 проценти од акумулациите. Тоа е доста добро, бидејќи летоска беа околу 70 проценти. Сега, во овој период од годината, тоа се многу добри бројки. Ние како држава ќе преземеме сѐ за да има сигурност во снабдувањето, односно секогаш да има електрична енергија за граѓаните.

За цените и евтината тарифа додаде:

– Ние како Влада правиме сѐ да нема некакви ценовни шокови за граѓаните, бидејќи во првиот тарифен модел се наоѓа најголемиот број од населението, значи околу 80 проценти. Ќе направиме сѐ да нема некакви поскапувања, меѓутоа знаете дека постојат неизвесности… Што се однесува до евтината тарифа, претседателот на Регулаторната комисија за енергетика кажа дека тие таму прават некои анализи и ќе видиме…

Најнови вести од: Македонија

Општина Охрид ги засилува активностите за затворање на депонијата „Буково“ и воспоставување нов систем за комуналниот отпад

Завршена е постапката за избор на проектант за изработка на техничката документација за затворање на нестандардната депонија „Буково“, а во тек се и активностите за изградба на претоварна станица кај Мауцкер и собирен центар во Охрид. Претоварните станици и Регионалниот центар за управување со отпад во Новаци се очекува да бидат функционални во 2030 година. Ова беше истакнато на денешната средба во Општина Охрид, посветена на новиот Регионален план за управување со отпад и воспоставувањето интегриран систем за Југозападниот и Пелагонискиот плански регион.

Зафировски за признанието на Михаилова за ДАНС: Ова е бугарска пародија, во која самата се излаја за поврзаноста со тајните служби

Срамота и давање автогол, бугарска пародија во која Ива Михаилова самата недоветно се излаја за улогата на тајните служби и бугарската ДАНС во целиот нејзин „случај“, посочи безбедносниот аналитичар Воислав Зафировски во „За македонските работи“ со Љупчо Цветановски. Недораснато дете кое избрза и искрено си кажа се што треба и не треба, класичен автогол во полза на Македонија за случај кој беше поддржан и од највисоките бугарски функционери.

Муцунски: Проширувањето на ЕУ е геополитичко обединување на Европа и стратешка инвестиција во постабилен и побезбеден континент

Министерот за надворешни работи и надворешна трговија Тимчо Муцунски синоќа во Скопје се обратил на конференцијата „Безбедноста во Западен Балкан“, организирана од германскиот институт „Аспен“ (Aspen Institute Germany) во соработка со Министерството за надворешни работи и надворешна трговија.

„КАЖИ НЕ!“ – кампања на МВР против сексуалната злоупотреба на деца во дигиталниот простор (ВИДЕО)

Целта на кампањата е да се подигне свеста кај децата, младите, родителите и пошироката јавност за препознавање и спречување на сексуалната злоупотреба во дигиталниот простор

Јовановски: На негирањата на македонската историја ќе одговориме со научна храброст и смиреност

„Од национални приказни до испреплетени истории“ е насловот на дводневната меѓународна конференција што ја организира Институтот за историја при Филозофскиот факултет на УКИМ по повод 80 години од неговото основање. Програмата опфаќа неколку пленарни и тематски сесии посветени на историските процеси, националните наративи, културните и дипломатските односи, како и на современите пристапи во историските истражувања. Учесниците ќе се претстават со реферати за историјата на Македонија од средновековниот период до современата државност, за односите на Балканот, османлискиот период, светските војни и меѓународните историски влијанија.

Најнови вести

To top