Продлабочување на соработката меѓу Министерство за енергетика, рударство и минерални суровини и УНДП во повеќе приоритетни области – енергетска ефикасност, дигитализација, сајбер безбедност и развој на човечкиот капитал беа во фокусот на денешната средба на министерката за енергетика, рударство и минерални суровини, Сања Божиновска со Риад Медеб, директор на Хабот за одржлива енергија при Програмата за развој на Обединетите нации (УНДП) која се одржа во рамки на форумот IFESD-14 во Скопје.
Како што информираат од Министерството, на средбата Медеб ја пофалил Македонија за проактивниот пристап во развојот на локални енергетски заедници и истакнал дека новиот Закон за енергетика е напреден и создава солидна основа за понатамошен развој на енергетскиот сектор. Тој нагласил дека УНДП ќе продолжи да биде стратешки партнер на земјата во транзицијата кон зелена економија, со поддршка за имплементација и усогласување на регулативата со европските стандарди.
-Министерката Божиновска ја истакна важноста на дигитализацијата и сајбер безбедноста во енергетските компании и институции, потенцирајќи дека тоа е предуслов за финансиски одржливи и транспарентни проекти. Во фокус на разговорот беа и новите технологии и можностите за примена на вештачка интелигенција (AI) за подобрување на енергетската ефикасност – преку предвидување на потрошувачката, оптимизација на ресурсите и автоматизација на системите за управување со енергија, стои во соопштението на Министерството.
Посебен акцент бил ставен и на јакнењето на капацитетите и вклучувањето на жените во праведната енергетска транзиција, како и на развивање на програми за обука и образование во областа на одржливата енергија.
-Во насока на поттикнување на иновациите, беше предложо и воспоставување на „Лабораторија за иновации во енергетиката“, која би служела како простор за тестирање нови технологии, поддршка на стартапи и промовирање на одржливи решенија. Министерката Божиновска нагласи дека Македонија е подготвена да биде партнер на УНДП во развој на вакви модели, кои ќе го забрзаат процесот на енергетска транзиција и ќе го зајакнат човечкиот и технолошкиот потенцијал на земјата, дополнуваат оттаму.