Со кој и да се сретне во последно време бугарската претседателка Илијана Јотова не пропушта да се пожали од Македонија, па така беше и на средбата со високиот комесар на Обединетите нации за човекови права Фолкер Тирк во Њујорк, на која, пак, ја пофали својата земја.
„Бугарија е пример за добар етнички модел во Европа“, истакнала Јотова пред Турк, според соопштението на нејзиниот кабинет, во кое не е објаснето на што точно мислела шефицата на бугарската држава.
Честитајќи му на Тирк за неговата активна работа во заштитата на човековите права, таа само додала дека „човековите права не се дадени еднаш засекогаш и ние мораме постојано да се бориме за нив, особено во контекст на конфликтите од последните години. За жал, ги напуштаме веќе усвоените документи во нивната заштита“.
Затоа, пак, Јотова уште еднаш експлицитно ја нападна Македонија, во која, според неа, „продолжува да се врши систематски институционален притисок и дискриминаторски третман врз основа на етничко потекло“, наведувајќи го како пример случајот со Ива Михајлова.
„За нас е неприфатливо во 21. век луѓето да бидат отпуштени од работа или да не бидат примени на универзитет поради нивното потекло, да бидат тепани поради нивното бугарско потекло. Во Северна Македонија ќе стапи на сила и ретроактивен закон, кој ќе ја наруши нивната слобода на здружување“, истакна претседателката на Бугарија, која со шефицата на дипломатијата Велислава Петрова е во Њујорк за заседанието на Генералното собрание на ОН.