Во Македонија повеќе не го прифаќаат бугарскиот лев како средство за плаќање при купување во малопродажни објекти, во ресторани, на пазари и кај таксисти, објави Бугарското национално радио (БНР), додавајќи дека купувањето со евра е можно, но само со картичка.
„Спонтано решив да одам во Крива Паланка и во Куманово. Немав денари за менување, но имав левови и евра. Се испостави дека не ми вршеа работа, бидејќи никаде повеќе не прифаќаа левови, а во голема продавница во Куманово не примаа готовина ни во евра. Касиерката не можеше да објасни зошто. Морав да платам со картичка. Платив, но ако патувате во Македонија, за секој случај, менувајте денари, бидејќи не сум сигурна дали помалите продавници и ресторани имаат ПОС-терминали“, вели жителка на Ќустендил во репортажата на БНР насловена „Во Северна Македонија го отпишаа бугарскиот лев“.
Во прилогот се додава дека со воведувањето на еврото во Бугарија замрела и децениската „куферска трговија“ преку границата, која всушност изумрела пред многу години, кога стоките отаде Деве Баир станале поевтини отколку во Ќустендил, па сега имало обратен процес – Бугари доаѓаат во Македонија за поевтино пазарење или јадење во кафеана.
Во Бугарија, која од 1 јануари премина на евро, со левови може да се плаќа во готовина до 31 јануари, а кусур се враќа во евра. Од 1 февруари при плаќање стоки и услуги со кеш ќе се примаат само евра.