Царинската управа на Република Македонија во 2025 година оствари наплата на приходи во висина од 131,6 милијарди денари, односно 2,14 милијарди евра. Ова претставува раст од 5,2 отсто во споредба со 2024 година, или 105,1 милион евра повеќе средства слеани во државниот буџет.
Раст е забележан по сите основи: приходите од царина бележат зголемување од 15,5 отсто, од данок на моторни возила 12,5 отсто, од акциза 5,9 отсто и од ДДВ при увоз 3,2 отсто.
– На годишно ниво имаме континуиран раст на приходите, при што најголем процентуален раст од 10,6 проценти е забележан во декември, а притоа е реализирана наплата на приходи од 190,2 милиони евра. Кумулативно за цела 2025 година наплативме приходи од 2,14 милијарди евра или 105,1 милиони евра повеќе од лани – изјави директорот на Царинската управа, Бобан Николовски.
Според него, овие податоци јасно укажуваат на зголемена ефикасност во работата на институцијата.
– Ова значи повеќе средства за капитални инвестиции кои ќе генерираат одржлив економски раст – повеќе средства за здравство, за образование, за нови градинки и училишта, за инвестиции во патна и железничка инфраструктура – нагласи Николовски.
Овие резултати доаѓаат во контекст на континуирани напори за подобрување на контролите и борба против нелојалната конкуренција, што придонесе за поголема финансиска дисциплина во увозот.