Според информациите од Државната изборна комисија (ДИК) за МИА, до 28 август 2025 година, 13 независни кандидати започнале постапка за собирање потписи за градоначалници во следните општини: Македонска Каменица, Куманово, Охрид, Дебарца, Дебар, Демир Капија, Македонски Брод, Кочани, Битола, Могила, Новаци, Демир Хисар и Град Скопје. Сите кандидати ги поднеле своите кандидатури, освен во Куманово, каде процесот на собирање потписи сè уште е во тек.
Истовремено, во пет општини — Дебар, Кочани, Чешиново Облешево, Битола и Могила — се собираат потписи за советнички листи за општинските совети. Во Битола, постапката за собирање потписи за советници е сè уште активна, додека во останатите општини листите со собрани потписи се веќе поднесени.
Од ДИК истакнуваат дека досега не се забележани значителни разлики во интересот за собирање потписи меѓу општините. Исто така, нема пријавено проблеми во врска со процесот на собирање потписи во ниту едно од подрачните одделенија на ДИК.