Градоначалничката на општина Кисела Вода, Бети Стаменкоска-Трајкоска, денеска за празникот Василица го посети Клубот на деца со церебрална парализа во населбата Расадник.
Како што соопштија од Општината, по повод Стара Нова година, градоначалничката се дружеше заедно со децата и нивните родители во празнична атмосфера, при што се делеше пита со паричка, а покрај пакетчиња, таа им додели и донација – столчиња, кои им беа потребни за подобро функционирање на Клубот.
Средствата за столчињата се обезбедени преку хуманитарната претстава организирана од Општина Кисела Вода и театарското здружение „Големи, а мали“.
– Особено ми е драго што денеска заедно ја одбележавме Стара Нова година и што можевме да ги израдуваме и да им подариме нешто што навистина им е потребно. Општина Кисела Вода ќе продолжи да работи на создавање услови во кои лицата со церебрална парализа ќе се чувствуваат поддржано, прифатено и вклучено во секојдневниот живот. За нас, важно е да ги слушаме нивните потреби, да ги поддржуваме нивните семејства и да обезбедуваме конкретни решенија, кои реално го подобруваат квалитетот на нивниот живот – истакна градоначалничката Стаменкоска-Трајкоска, стои во соопштението.