Демократската унија за интеграција (ДУИ) остро ги отфрла обвинувањата на премиерот Мицкоски, нарекувајќи ги неосновани и опасни. Според партијата, тврдењата за наводни тајни сценарија со СДСМ и предизвикување хаос на изборите се чиста клевета, со цел да се прикрие недостигот на легитимитет на неговата моноетничка влада. ДУИ нагласува дека секогаш била столб на слободни и демократски избори и дека нема мотив ниту интерес да учествува во какви било „тајни планови“ или да создава нестабилност, како што тврди Мицкоски. Партијата предупредува дека ваквите изјави можат да поттикнат етнички тензии и повикува на одговорност во политичкиот дискурс.
„Наместо да измислува имагинарни непријатели, премиерот треба да објасни зошто неговата влада го крши Уставот, зошто ги дискриминира Албанците. Зошто, спротивно на Уставот и законот, го намали бројот на советници, зошто ја инструментализира ДИК, Уставниот суд и другите институции во служба на неговите партиски и моноетнички планови и зошто со секоја одлука ја враќа државата назад во времето пред 2001 година? ДУИ не може да остане рамнодушна кога се гази Охридскиот рамковен договор, кој е клучен за стабилноста на земјата и нејзината прогресивна иднина“,
се наведува во реакцијата на ДУИ.