Сулејман Љамалари, познат како Командант Барути, беше осуден на две години затвор и му е продолжен притворот. Тој е обвинет дека физички и вербално ја нападнал градоначалничката на Скопје, Данела Арсовска, за време на инцидент што се случи на 11 јули во скопската населба Чаир. Настанот се случил додека Арсовска вршела увид на терен по пријава за дивоградба.
Пресудата ја изрече денеска Кривичниот суд. Според обвинителството, Љамалари дошол со електричен тротинет и ја нападнал Арсовска, нанесувајќи ѝ телесни повреди и упатувајќи сериозни закани.
Арсовска сведочеше дека обвинетиот е истото лице кое, според нејзините сознанија, и претходно ѝ упатувало закани преку социјалните мрежи. Таа рече дека заканите јавно ги објавила на својот профил и подоцна ги идентификувала како поврзани со Љамалари.
Обвинетиот, кој претходно работел во ЈП „Паркови и зеленило“, на судењето тврдеше дека не тој, туку градоначалничката прва го удрила и го снимала со телефон.