Основното јавно обвинителство од Прилеп поднесе обвинителен акт против 8 физички и едно правно лице за продолжени кривични дела – Проневера во службата и Злоупотреба на постапката за јавен повик, доделување договор за јавна набавка или јавно-приватно партнерство. Направената штета се проценува на 156 илјади евра.
За проневера обвинети се поранешна директорка на ЈЗУ Општа Болница Прилеп и уште тројца вработени во болницата, кои од почетокот на 2022 до јули 2024 година противправно присвоиле 156 илјади евра во денарска протввреднист, доверени во службата. Преку фиктивни налози за работа и обрасци/каси исплати со невистинита содржина за наводно извршени работи за потребите на болницата на физички лица им исплаќале средства од остварениот промет од наплата на партиципација за здравствени услуги, без користење на системот на УЈП, без склучени договори за дело и без документација за оправданост на трошењето.
Исплатите често се правдале со фискални сметки за гориво, но и со фискални сметки од пицерии, ресторани, кафеани, кафулиња, слаткарници и други угостителски објекти, односно како трошења кои не биле за потребите на болницата. Со цел да ги прикријат дејствијата, во компјутерскиот сметководствен систем на болницата внесувале податоци со невистинита содржина и вршеле корекции на создадените записи, внесувајќи нови износи кои одговарале на фиктивно изготвени налози за работа.
За злоупотреба на постапката за јавен повик, доделување договор за јавна набавка или јавно-приватно партнерство обвинети се поранешната директорка и еден обезбедувач во болницата, управител и двајца сопственици на правно лице за обезбедување на имот и лица, како и таа агенција за обезбедување.
Сите тие заеднички, со умисла, во два наврати, свесно ги повредиле прописите за доделување договор за јавна набавка, со неизвршување на обврските од договорот за физичко обезбедување на болницата и со намера тој да се изигра. Со тоа му овозможиле на обвинетото правно лице да оствари околу 107 илјади евра. Со тоа ѝ била нанесена значителна штета. Иако ангажираната фирма не ги исполнувала обврските од договорот, се вршела фиктивна евиденција и услугите редовно им се исплаќале по доставените фактури.
Освен ова, поранешната директорка на прилепската болница е обвинета и за продолжени кривични дела Злоупотреба на службената положба и овластување, бидејќи во повеќе наврати кон угостителски објекти – кафеани и ресторани, како и кон колонијални продавници одобрувала исплата на средства од контото – храна за болни, иако набавените услуги и производи не биле наменети за потребите на пациентите во болницата.
На овој начин и нанела штета од околу 23 илјади евра на болницата. Од 2022 до 2024 година обвинетата вршела и неосновани исплати на додатоци за прекувремена работа на повеќе селективно избрани вработени, со што буџетот на болницата го оштетила уште а 30 илјади евра. Во Основното јавно обвинителство за гонење на организиран криминал и корупција продолжува истражната постапка за еден дел од дејствата, кои беа предмет на истрагата поведена по кривична пријава од Управата за финансиска полиција и врз основа на наоди од Државниот завод за ревизија.