Пораките од Желјасков и од Георгиев кон Македонија, според Енчев, се сведувале на тоа дека со впишувањето на Бугарите во Уставот се решава проблемот и оти нема да има нови услови, со што тој не се согласува.
„Внесувањето на Бугарите во Уставот на Република Северна Македонија не е крај, туку само почеток на процесот. Тоа е само еден од условите вклучени во Францускиот предлог и Договорот за пријателство од 2017 година. Вклучувањето на Бугарите во Уставот е неопходно за да се деблокира процесот, но е далеку од доволно, бидејќи веднаш следуваат други големи услови, пред сè – промената на учебниците по историја во РСМ. Станува збор за намерна замена на историските факти“, изјави Енчев за бугарското Радио Фокус.
Покрај овие две барања, Бугарија мора да инсистира и на прекин на говорот на омраза, како и на гарантирањето на правата на Бугарите во Македонија, додава докторот по меѓународни односи и по меѓународно право, оценувајќи ја како скандалозна изјавата на Желјасков дека „нема да го претвориме процесот во билатерален“.
„Договорот со Скопје е билатерален, но во исто време имаме гарант за овој билатерален договор – Франција. Кога ќе го напуштите билатералниот процес и Договорот за добрососедство, што можете да очекувате од арбитарот кога ќе побарате од Скопје да ја исполни својата обврска за корекција на учебниците по историја? Во оваа смисла, тврдам дека премиерот Желјазков или свесно прави таков чин, или станува збор за непознавање на материјата“, коментира Енчев.