Лидерот на СДСМ, Венко Филипче, ги изедначи својата партија и државата на вечерашната средба во Штип со претставниците на општинските организации од третата изборна единица.
„Жалам што имаше другари кои се обидуваа и конгресот да не успее. Пуштаа пораки на делегатите, им кажуваа да не доаѓаат. Сакам јасно и гласно да им кажам да им биде последно. На крај памет, не да направат нешто, да помислат нешто, да направат против партијата од која добиле сè. Не станува збор за мене. Ние не можеме да работиме еден против друг, против СДСМ. Кој и да работи против, работи против партијата. Со тоа, во оваа ситуација и против државата“, рече Филипче.
Како и на неодамнешниот конгрес, тој повторно им се обрати на „тројанските коњи од ВМРО-ДПМНЕ“.
„Има некои луѓе кои што се амбицираат како некоја групација, меѓутоа не сакаат да дојдат и да разговараат, не сакаат да ги соочат аргументите, затоа што аргументи немаат. Затоа што се платени од ВМРО-ДПМНЕ на кои што проектот ЗНАМ веќе им пропадна, и не може да сметаат повеќе на тоа“, порача Филипче од Штип.