Само на два метри од деца и возрасни кои одмораа во паркот во Ѓорче Петров, падна големо дрво, предизвикувајќи револт кај граѓаните кои веќе две години апелираат за редовно одржување на зелените површини. Според информациите споделени на фејсбук страната “Мое Ѓорче”, инцидентот се случил во време кога во паркот престојувале околу 40 граѓани, меѓу кои и деца кои се играле во близина на местото каде што паднало дрвото.
Граѓаните тврдат дека во изминатите две години повеќе од 200 пати се обратиле до надлежните институции, бидејќи паркот е во надлежност на Јавното претпријатие “Паркови и зеленило” и Град Скопје, но нивните апели останале без одговор.
“Вртевме и вчера и никој не крена”, се жали авторот на објавата, алудирајќи на тоа дека службите не реагираат на навремен начин.
Меѓутоа, веднаш по падот на дрвото, во рок од 30 минути на местото пристигнале вработени од комуналната служба на општината кои го отстраниле дрвото. Граѓаните сметаат дека оваа брза реакција е мотивирана од стравот од правни последици, а не од грижата за безбедноста.
Авторот на објавата потврди дека им остави свој телефонски број на службениците и изјави дека е подготвен, заедно со останатите сведоци од паркот, да сведочи доколку дојде до правни постапки.
Гаѓаните отворено ја критикуваат градоначалничката на Град Скопје, Данела Арсовска, бранувајќи од неа да преземе лична одговорност за состојбата во парковите.
Овој инцидент повторно ја отвора дискусијата за потребата од редовно одржување на градските паркови и навремено отстранување на потенцијално опасни дрвја, особено во области каде што често престојуваат семејства со деца.
До моментот на објавување на овој текст, Град Скопје и ЈП “Паркови и зеленило” не се изјаснија по случувањето.
Објавата можете да ја погледнете на официјалната фејсбук група Мое Ѓорче.