По повеќе од три години застој, денес во просториите на Град Скопје се одржа првата седница на Координативното тело на градоначалници. Со повторното активирање на ова тело се воспоставува редовна и функционална пракса на координација меѓу сите општини, со цел навремено и системски решавање на проблемите во Скопје, соопшти градската управа.
Градоначалниците договорија заеднички пристап во креирањето на Буџетот на Град Скопје и во дефинирањето на приоритетите, со што ќе се овозможи поефикасно решавање на наталожените предизвици, но и подобра усогласеност во реализацијата на нови проекти од интерес на граѓаните, порачува Град Скопје.
„Состојбите што ги наследи Градот беа критични – нарушена финансиска стабилност, нефункционални јавни претпријатија и нерешени комунални проблеми. По преземените мерки, ситуацијата е стабилизирана и ставена под контрола. Ги расчистивме големите и малите диви депонии, градот е значително почист, а јавните претпријатија кои со месеци немале примено плата во меѓувреме се консолидирани со уредени здравствени и пензиски придонеси“, се вели во соопштението.
Започнати се и тендерски постапки за клучни проекти предвидени во програмата: решавање на проблемот со Лимак, изградба на кружниот тек во Ѓорче Петров, стабилизација на водниот притисок во високите зони и серија други инфраструктурни и комунални зафати што директно ќе го подобрат животот на скопјани.
Паралелно, Градот спроведува акција за отстранување на времените објекти кои го узурпираат јавниот простор. „Целта е јасна – ослободување на тротоарите, уреден јавен простор и безбедно движење на пешаците“, се вели во соопштението.
„Следува многу работа и многу посветен труд. Ќе работиме дисциплинирано, координирано и со јасна цел – подобро Скопје за сите граѓани. Најдоброто допрва доаѓа“, изјави градоначалникот на Скопје, Орце Ѓорѓиевски.