Лидерот на ЗНАМ и градоначалник на Куманово вели дека односите во владината коалиција се стабилни, дека министрите од неговата партија имаат резултати, а случајот со Артан Груби го оцени како „невиден преседан“
Претседателот на Движењето ЗНАМ и градоначалник на Куманово, Максим Димитриевски, во емисијата „За или против“ со Мери Симоновска на ТВ Алфа порача дека ЗНАМ е стабилен и самостоен политички субјект во рамки на владејачкото мнозинство и дека нема судир со ВМРО-ДПМНЕ, и покрај шпекулациите што, според него, ги пласира опозицијата.
Димитриевски истакна дека ЗНАМ влегол во власта од државни и патриотски причини, со цел да не се дозволат „репризи од минатото“, и нагласи дека коалицијата со ВМРО-ДПМНЕ функционира суштински, а не само формално.
„Ниту сме биле, ниту некогаш ќе бидеме сателит партија. ЗНАМ е свој политички субјект со своја идеологија и сопствени чекори на политичкиот простор на Македонија“, рече Димитриевски.
Тој додаде дека неговата партија е задоволна од своето учество во Владата, особено во ресорите правда и јавна и државна администрација, каде, како што посочи, се работи на сериозни законски решенија и системски реформи.
Во однос на најавите за можна реконструкција на Владата, Димитриевски потврди дека со премиерот разговарал за временската рамка, но не и за конкретни имиња. Сепак, нагласи дека е целосно задоволен од работата на министрите од редовите на ЗНАМ, вклучително и од министерот за правда Игор Филков.
Најостар беше во коментарот за случајот со поранешниот вицепремиер Артан Груби, оценувајќи дека одлуката по 14 месеци надвор од државата да добие куќен притвор е „невиден и незапомнет преседан“.
„На господинот Груби не му е место дома. Неговото место е во истражен затвор“, порача Димитриевски, додавајќи дека главната одговорност ја гледа кај обвинителството, но и дека Судскиот совет и Советот на јавни обвинители треба темелно да го преиспитаат случајот.
Според него, ваквите одлуки дополнително ја уриваат и онака ниската доверба на граѓаните во правосудниот систем.
Осврнувајќи се на политичката сцена, лидерот на ЗНАМ оцени дека СДСМ е во континуиран пад и дека дел од нивното членство веќе се дистанцира од актуелното раководство.
„Тој политички субјект во континуитет ќе паѓа, а чесните членови или ќе се пасивизираат или ќе доаѓаат во редовите на ЗНАМ“, рече Димитриевски.
Во делот на евроинтеграциите, Димитриевски порача дека Македонија во моментов е „на кружен тек“ на патот кон Европската унија, но дека причината за застојот не е во државата, туку во односите со соседите, пред се со Бугарија.
Тој ја критикуваше и одлуката на бугарските власти за забрана за влез на адвокатот Тони Менкиноски, оценувајќи дека Софија со тоа покажува недемократски однос кон прашањето за Македонците во Бугарија.
Говорејќи за предлогот на ЗНАМ за намалување на бројот на пратеници, Димитриевски повтори дека Македонија има потреба од поефикасен парламент и дека бројката од 90 пратеници е разумна и функционална.
На крај, тој порача дека Македонија мора да остане доследна на сопствените позиции во однос на идентитетските прашања и европскиот пат.
„Ние сме Македонци откако векот векува и светот светува и такви ќе останеме. Како Македонци ќе влеземе таму, без разлика дали тоа некому му се допаѓа или не“, истакна Димитриевски.