Заменик-министерот за внатрешни работи Астрит Исени ѝ порача на ДУИ, која ја повлече согласноста од лидерската средба непосредно пред гласањето за „Безбеден град“, дека системот ќе се спроведе со или без нив, а не пропушти ни да го „пецне“ лидерот Али Ахмети околу контролата врз неговата пратеничка група, од која двајца гласаа за законот.
„’Безбеден град’ не се камери. Тоа се спасени животи. Тоа е крај на хаосот на патиштата и неодговорноста што одзеде човечки животи“, пишува Исени на својот приватен профил на Фејсбук, обвинувајќи ја ДУИ дека избрала да излезе против безбедноста на граѓаните.
„Од ветувања за поддршка, тие отидоа да го саботираат виталниот закон, само за евтини политички пазарења. Денес стана јасно: јавната безбедност им вреди помалку од партиските интереси. Ова покажува нешто друго: Али Ахмети не ја контролира ни сопствената група пратеници, а камоли државата. ВРЕДИ не се повлекува и не се плаши. ‘Безбеден град’ ќе се спроведе со или без ДУИ. Ние сме на страната на граѓаните, а не на страната на пазарењата. Кој е против безбедноста, е против народот“, пишува Исени.