Хрватскиот славист, македонист и член на Македонската академија на науките и уметностите надвор од работниот состав, Горан Калоѓера, го сподели своето задоволство што се најде меѓу годинашните лауреати на Меѓународниот фестивал „Јаков од Камена Река“ во Македонска Каменица.
„Во врска со признанието. Ви благодарам на сите за честитките. Второ, ова е мојата прва награда (признание) која ја добивам од Македонија по девет години тишина. Кога човек ќе помисли дека е заборавен (што е нормално), се појавува едно признание, кое го прави среќен и го стимулира. Можам да кажам дека сум задоволен. Благодарам на „Јаков од Камена Риека“, благодарам на Македонска Каменица“, објави на Фејсбук поранешниот почесен конзул на Македонија во Риека до смената од Владата на Зоран Заев во 2017 година.
Вљубеникот во Македонија и прекален борец за „македонските правдини“ со децении наназад ја доби наградата „Јаков од Камена Река“ за промоција на македонскиот јазик, литература и култура.
Истоимениот фестивал во саботата го имаше своето четврто издание во чест на првиот македонски печатар, кој само еден век откако Јохан Гутенберг ја измислил печатарската машина ја отпечатил „Часослов“ на црковнословенски јазик во 1556 година во Венеција.
