– Епидемијата стивнува бидејќи последните две недели имаме по два нови случаи. Значи, оваа недела, по објавувањето на извештајот од Институтот за јавно здравје, в понеделник, ќе имаме два нови сомнителни случаја. Дека се смирува ситуацијата, говори и фактот дека во моментот на Клиниката за инфективни болести имаме шест згрижени лица, изјави Клековски во однос на извештајот на ИЈЗ за периодот до 8 септември, во кој се наведува дека е регистриран и случај во Свети Николе, посочи Клековски.
Смирувањето на ситуацијата, според Клековски, не е поврзано со заладувањето бидејќи новите случаи се заразени пред три до 14 дена.
-Мислам дека постапувањето по индикации влијаеше и е постигнато тоа што го очекувавме. Сепак, точни закономерности не постојат во оваа епидемија. Имаме три пронајдени мртви гаврани со вирусот во општини во кои нема регистрирано случаи на западнонилска треска (два во општина Карпош и еден во Ресен) – посочи Клековски.
На Клиниката за инфективни болести згрижени се вкупно шест пациенти, од кои само двајца се со потешка клиничка слика. Се работи за пациенти што подолг период се хоспитализирани.
-Тие подолго време се на Клиниката, ставени се на поддршка за дишење. Другите четворица се во стабилна состојба и се на Одделот на невроинфекции. Двајца се водат како сомнителни, бидејќи се понови, а кај другите двајца при крај е процесот на закрепнување и набргу ќе бидат отпуштени од болница, изјави директорот на Инфективната клиника, Фадил Цана.