Гералд Кнаус, соосновач на влијателниот тинк-тенк Европска иницијатива за стабилност (ЕСИ), во интервју за ТВ 24 ја охрабрува Македонија да си го турка предлогот за впишување Бугари во Уставот, промена што ќе стапи во сила истовремено со официјализирањето на македонското членство во Европската унија.
„Ако го промените вашиот устав и имате конференции и состаноци, но не постои гаранција дека овој процес ќе доведе до некаков резултат, тогаш зошто би го промениле вашиот устав? Но, постои излез. А излезот е, да се каже – го сменивме нашиот устав, но стапува во сила, правно станува валиден, само на денот кога на пример: ние сме полноправна членка на ЕУ или ние сме полноправна членка на Единствениот пазар и на Шенген“, изјави Австриецот.
Според него, членството во ЕУ без право на вето е идеја во ќорсокак, но отвора врата за концептот – приклучување на единствениот европски пазар до 2028 година.
„Не мислам дека сегашната идеја за прием на Украина или други земји без право на вето ќе успее, но гледам огромна можност за уште една идеја која ја ставивме на маса пред многу години, а тоа е секоја земја што ги исполнува критериумите, би требало во 2028. да може да се приклучи на единствениот пазар. Украина, но и Северна Македонија“, објасни Кнаус.