„Во четири општини не беше достигнат цензусот за избор на градоначалници, но најсложена е состојбата во Гостивар. Валбон Лимани, кој од јули е вршител на должноста градоначалник на општина Гостивар, вели дека ‘според законот има право да остане на функцијата’ до изборот на нов градоначалник на редовни избори. Тој најавува дека ќе поднесе жалба до Уставниот суд, ако Владата именува нов в.д. градоначалник.“ – објави ТВ 21 во својата информација со наслов „Валбон Лимани не се повлекува: вели дека ќе остане на функцијата сè до изборот на нов градоначалник“.
Натаму телевизијата наведува: „На осми јули бев избран како в.д. градоначалник на општина Гостивар. Согласно со законот за локална самоуправа, член 54, а потоа и член 4, јас треба да ја извршувам функцијата градоначалник сè до изборот на нов градоначалник на редовни избори. Законот вели дека треба да се избере нов градоначалник, без да се прецизира дали станува збор за редовни, повторени или вонредни избори. Јасно е наведено дека мојот мандат трае до изборот на нов градоначалник на редовни избори.“ – тврди Валбон Лимани.
Тој додадава дека „дека ќе ги искористи сите законски средства“, ако „Владата се обиде“, како што вели, „да го прекрши законот“.
„Ако Владата донесе одлука за именување, ќе ја обжалиме и ќе бараме од Уставниот суд да оцени дали таа одлука е во согласност со уставот и законот. Верувам дека правото е на наша страна. Сите правни експерти и поранешни судии, што ги консултиравме, велат дека во случајот со Гостивар ситуацијата е јасна и чиста – според законот, јас треба да ја извршувам оваа функција до избор на нов градоначалник.“ – тврди Валбон Лимани.
Од друга страна, премиерот Христијан Мицкоски изјави дека Владата ќе постапи во согласност со законот, откако ќе го добие официјалното известување од Државната изборна комисија за неуспешните избори во четирите општини. – објави ТВ 21.