Професорите од Факултетот за туризам и угостителство во Охрид (ФТУ), проф. д-р Климе Попоски и доц. д-р Бојан Србиноски, дадоа значаен меѓународен придонес во науката за осигурувањето, земајќи учество како автори на поглавје во новата стручна книга „Solvency II Present and Future“.
Книгата е издадена од страна на реномираната издавачка куќа „Oxford University Press“, што претставува огромен успех за македонската академска заедница.
Уредници на ова капитално дело се светски признатите професори во областа на осигурувањето: Карел Ван Хуле (Karel Van Hulle), Хелмут Грундл (Helmut Grundl) и Мирко Крафт (Mirko Kraft).
Попоски и Србиноски присуствуваа и на официјалната промоција на книгата која се одржа во Брисел, во организација на Германската асоцијација за осигурување.
Од Факултетот за туризам и угостителство – Охрид не го кријат задоволството од овој голем успех на нивниот кадар.
„Горди сме што нашиот факултет континуирано придонесува кон образованието и науката во областа на осигурувањето“, се вели во соопштението на ФТУ објавено на нивните официјални мрежи.
Ова меѓународно признание е уште еден доказ за високиот квалитет на научно-истражувачката дејност што се негува на Охридскиот факултет, позиционирајќи ги македонските експерти рамо до рамо со светските капацитети во осигурителниот сектор.