Имаше регионална иницијатива од земјите од Западен Балкан и треба час поскоро да се олесни пристапот на превозниците. Онаа зелена лента која се најавуваше од страна на Европската Комисија да профункционира. Мислам дека тоа нема да биде проблем, рече премиерот и лидер на ВМРО-ДПМНЕ, Христијан Мицкоски, одговарајќи на новинарско прашање.
-Она кое што јас ќе го покренам како прашање и на дискусијата сега со претседателката на Европската Комисија, но и на Берлинскиот процес, ќе биде токму тоа. Кога ќе слетате на било кој аеродром во земја-членка на Европската Унија има „граѓани на ЕУ“ и „граѓани кои не се ЕУ, а се дел од Европа и други“. Ако навистина сакаме до 2030-та да го видиме регионот како дел од Европа, мислам дека Европа да не нè дискриминира, сите да можеме да бидеме граѓани на Европа и сите да можеме да поминуваме пасошка контрола и да не бидеме дискриминирани зашто не сме дел од ЕУ. Да поминуваме на брза трака, сите поседуваме биометриски пасош, рече Мицкоски.
Тој порача дека ако има волја има и начин.
-Еве ова нека биде првата испорака која би ја дала ЕУ за Западен Балкан и ова ќе биде дел од мојата дискусија со Фон дер Лајен и колегите од Европската Унија за време на Берлинскиот процес, посочи Мицкоски.