Христијан Мицкоски истакна дека е наследена лоша состојба во Македонија, која од ден на ден се менува, за подобра иднина на сите граѓани. Мицкоски притоа посочи дека по изборите ќе следи длабока реформа во судството и обвинителството, институции, кои, како што нагласи, се тесно поврзани со неправдите и заштитата на криминалот. „Ќе следи и ресет на системот без поделби и влијанија.“ – дополни Мицкоски
„Состојбата која ја затекнавме беше повеќе од катастрофална, почнавме дословно од темелите на државата. Работиме секој ден и секој час, за да ја извадиме државата на вистинскиот пат. Не сум човек,што избрзува, ниту што брзо лета во облаци, туку ви велам — сега создаваме основа за нешто, што ќе се гради десетина години. По изборите ќе треба да влезе голема лопата најпрвин во судството и обвинителството, каде е сраснато со неправдите и штитењето на криминалот. Потребен е ресет на системот, без партиска или било каква поделба.“ – истакна лидерот на ВМРО ДПМНЕ и премиер Мицкоски.
Мицкоски ја посочи економијата и заштитата на животниот стандард како втора област, во која ќе се вложува, Во овој контекст тој ја објави новата инвестиција од 150 милиони долари, која ќе донесе 1000 нови вработувања во Македонија за подобар живот на сите граѓани и раст и развој на економијата.
„Воедно сакам да ви кажам за втората област каде непрестајно ќе продолжиме да работиме за борбата за заштита на животниот стандард и економијата. Следната година ќе биде исто така година на економија и повеќе пари и повисок стандард за секого. Би сакал да кажам една убава вест којашто мислам дека ќе ги израдува македонските граѓани: започнуваме со нов циклус на инвестиции, во завршни преговори сме со американско-британска компанија, којашто ќе вложи до 150 милиони долари во наменската воена индустрија во Македонија. Ќе имаме нови високоплатени 1000 работни места и ова е само почеток. Очекуваме во воената наменска индустрија инвестициите да достигнат повеќе од 1 милијарда долари.“ – рече Христијан Мицкоски.