„Врз основа на првичните индикатори, постои реална можност економскиот раст на земјата во првиот квартал да биде помеѓу 3,5 и 4 проценти и дека ќе бидеме едни од најдобрите во Европа“, изјави премиерот Христијан Мицкоски на првиот панел од Самитот „Македонија 2025“, кој од денес се одржува во Скопје.
Според него, доколку се подобри состојбата во европската економија, особено во автомобилската индустрија, тогаш постои можност за уште повисоки перформанси кои ќе се движат помеѓу пет и шест проценти.
Премиерот ја опишува Македонија како главна раскрсница каде, како што рече, „се пресекуваат коридорите 8, 10 и 11, кои, додаде, „се многу важни за јужното крило на НАТО и затоа нашите идни напори ќе бидат насочени кон интензивен развој на инфраструктурата“.
„Имаме потенцијал и во однос на перформансите сме пред сите други. Првата година од мандатот беше многу тешка и полна со предизвици бидејќи мораше да го запреме слободниот пад со кој се соочуваше земјата и е нереално да се започнуваат реформи кога сè уште решаваме фундаментални, суштински проблеми“, нагласи Мицкоски.