Дополнително, нагласи премиерот, изградбата на брза пруга на Коридор 10 останува еден од стратешките приоритети. Според премиерот, железницата мора повторно да стане двигател на извозот и логистиката, а не тесно грло на економијата.
-Посебно важен е еколошкиот аспект. Со фокусот на електрични локомотиви, се движиме кон нула емисија на загадувачки материи. Ова е директен придонес во борбата против аерозагадувањето, во заштитата на животната средина и во развојот на чист, модерен и одржлив транспорт. Во услови на енергетска транзиција, железничкиот транспорт станува клучен фактор за ефикасен, конкурентен и еколошки одржлив систем. Инвестициите во електрични локомотиви и модерни коридори се целосно усогласени со владините политики за интеграција во европските транспортни мрежи, подвлече Мицкоски. Како што информира тој денеска, ова ќе значи побезбеден, побрз и поефикасен железнички сообраќај.
На потпишувањето на Договорот со ЕБОР во Владата беа и вицепремиерот и министер за транспорт Александар Николоски и министерката за финансии Гордана Димитриеска-Кочоска. Почнати се и градежните работи за Линијата 1 или т.н. градски воз. Вредноста на договорот е 360 милиони денари. Проектот предвидува целосна реконструкција и надградба на постојната траса.