„Сакаме да одржуваме активна комуникација и континуиран ангажман со Софија, а доказ за тоа е проектот Коридор 8. Исто така, имаме конкретна комуникација со Европска Унија. Една од темите за кои разговаравме со претседателот на Европскиот совет, Антонио Кошта, во Минхен беше процесот на потенцијално изнаоѓање решение со соседна Бугарија, и тоа е нешто на што ќе продолжиме да работиме, но во рамките на јасно дефинираните принципи“, изјави министерот за надворешни работи и надворешна трговија Тимчо Муцунски пред Македонско-словачкиот бизнис-форум.
– Вчера присуствував на настан во Тирана посветен на Коридорот 8, каде двете страни преземаат опипливи мерки за реализација на проектот. Исто така, укажавме дека западниот сегмент во Албанија треба да се забрза и забележуваме позитивни сигнали од Албанија во последно време, што е за поздравување, бидејќи Коридорот 8 нема да биде целосен без придонесот на Албанија – не само од аспект на патната и железничката инфраструктура, туку и во енергетиката и други комплементарни прашања. Зошто го споменувам Коридорот 8? Бидејќи тој е доказ дека со соседна Бугарија можеме да соработуваме кога постои волја, нагласи Муцунски.
Тој потсети дека во моментот во соседна Бугарија тече изборен процес, па треба да се внимава на изјавите и на поставеноста, бидејќи Македонија нема интерес да биде дел од изборната реторика во соседната држава.
– Секој што се обидува да нè вклучи во изборната реторика во Бугарија не покажува про-ЕУ вредности. Ова го забележуваме и од одредени фактори во соседната држава, а, искрено, понекогаш и од одредени политички фактори тука, додаде Муцунски.
Тој потврди дека по ова прашање се води и конкретна комуникација со Европската Унија.
– Пред неколку дена присуствував во Минхен на средба на премиерот Мицкоски со претседателот на Европскиот совет, Антонио Кошта, каде една од темите беше потенцијалното изнаоѓање решение со соседна Бугарија. Тоа е процес на кој ќе работиме, но секогаш во рамките на јасно утврдените принципи, истакна Муцунски.