На плоштадот Македонија денес се одржа 11. издание на Дедомразовската трка 2025, традиционалната новогодишна улична трка во Скопје, која повторно го претвори центарот на градот во „црвен океан“ од дедомразовски костуми со „бранови“ од ведро предновогодишно расположение.
Оваа година во трката учествуваа рекорден број од над 800 натпреварувачи од цела Македонија. Најстариот учесник имаше 73 години, а најмладите беа бебиња помали од една година, кои заедно со своите родители се вклучија во веселата предновогодишна атмосфера.
Стартот и целта вообичаено беа поставени на Плоштадот Македонија: патеката од околу 2 километра се протегаше низ центарот на Скопје. Трчаа професионалци, почетници, а на прошетка дојдоа и голем број граѓани.
Оваа Дедомразовска трка од година во година привлекува сè поголем интерес и таа овојпат го задржа својот белег: многу насмевки и забава, пријателски дружења и фотографии.