„Загрижено“ што Албанија го отвори претпоследното поглавје од преговорите со Европската унија, а Македонија ниту едно, Бугарското национално радио го праша европратеникот Андреј Ковачев дали има сигнали дека македонската Влада е подготвена да го направи она што е потребно за втора меѓувладина конференција, односно да ги вклучи Бугарите во својот устав.
„Досега не гледам такви напори. Напротив, напорите се во спротивна насока. Се прави сè што е можно за да не се случи тоа, да се промени преговарачката рамка. Секако, дури и нивниот Уставен суд треба да се искористи за да се прогласи за неуставен вториот протокол кон Договорот за добрососедство и пријателство, кој е дел од преговарачката рамка. Еден вид индиректен обид да се промени нешто што е прифатено од нив и другите 27 земји-членки на Европската унија. Оваа тактика што ја користат постојано на сите нивоа, дека Република Северна Македонија, или претходно Република Македонија, е жртва на своите соседи, дека тие направиле огромен чекор или огромна жртва со промената на своето име од Република Македонија во Република Северна Македонија и сега не сакаат повеќе да прават такви жртви, а Бугарите се обиделе да ги решат своите билатерални проблеми, историски гледано, преку европската интеграција. Ова е непростлива лага, која тие, сепак, многу успешно, за жал, ја ширеа и во Вашингтон, и во Брисел, и во Париз, и во Берлин на различни нивоа, и со Каја Калас, и со Кубилиус, и со Марта Кос, дека се жртва. Оваа позиција на огромна жртва дека тие, малата земја, се неправедно дискриминирани од големите лоши соседи Грција, а сега и Бугарија, за жал, влијае врз емоционалната психа на некои од колегите кои не се доволно добро запознаени“, одговори Ковачев од ГЕРБ на експремиерот Бојко Борисов.