Заменик-директорката на штипската клиничка болница, Билјана Ефтимова, денес изјави дека, покрај извештајот на осигурителот, се очекува и дополнителна проценка, бидејќи по првичната штета, се утврдени и други штети што треба да се санираат.
„Ова се однесува на покривот и третиот кат, каде што се наоѓаат одделот за ортопедија, ортопедската сала, како и одделот за интензивна нега и кома центарот. Овие области се најоштетени, бидејќи остануваат без покрив. Сè уште не ја знаеме точната сума на штетата, но веројатно ќе биде во милиони денари, што несомнено е многу“, рече Ефтимова.
Министерот за здравство, Сашо Клековски, кој ја посети штипската болница, рече дека состојбата се следи и дека веќе се предвидени средства за реконструкција во буџетот на болницата.
„Министерството ќе го следи процесот и, врз основа на проценката на штетата, ќе одобри потребни средства за работите да се завршат навреме и ортопедијата да се стави во функција што е можно поскоро“, изјави министерот.