Пред претставниците на медиумите беа презентирани шлем, штит, меч, копја и други гробни прилози, откриени во недопрен археолошки контекст. Целината претставува исклучително значаен наод за проучувањето на архајскиот период и дополнително го потврдува карактерот и големото научно значење на некрополата во Корошишта.
Истражувањата оваа година донесоа ново исклучително откритие – богато војничко погребување со комплетна воена опрема, меѓу која се откриени штит, шлем, копја, меч и други предмети од злато, бронза, килибар и други материјали.
Најновите резултати се од особено значење бидејќи дополнително и недвосмислено го потврдуваат карактерот на локалитетот Расница како некропола од архајскиот период, отворајќи нови можности за проучување на погребните обичаи, воената и општествената структура и елитите што живееле на просторот на Охридско-струшкиот регион во текот на VI век пр. н.е.
Локалитетот Расница кај Корошишта го привлече вниманието на јавноста во 2024 година, кога археолошките истражувања открија монументална гробна целина и исклучително богат археолошки материјал. Меѓу тогашните наоди беа бронзен шлем со златни апликации, бронзен штит, златен надградник, златни прстени и фолии, килибарни и стаклени мониста, сребрени игли и кантарос, како и повеќе бронзени садови.
Откритијата од 2026 година сега внесуваат нова и исклучително важна димензија во разбирањето на некрополата. Богатото војничко погребување и комплетот оружје откриен во него претставуваат значаен археолошки контекст што ќе овозможи попрецизно согледување на статусот, идентитетот и воената улога на дел од лицата погребани на оваа некропола.
Со континуираните истражувања, Корошишта се издвојува како еден од најзначајните новооткриени археолошки комплекси од архајскиот период во земјата и како локалитет од особено значење за проучувањето на Охридско-струшкиот регион во VI век пр. н.е.
Директорката на Националниот археолошки музеј на Република Македонија, м-р Магдалена Манаскова, му честиташе на тимот археолози, предводен од раководителот на истражувањата д-р Перо Арџанлиев, за истрајноста, посветеноста и големиот професионален успех со кој, по втор пат во само две години, македонската археологија се збогатува со откритие од исклучителни размери. Воедно, Манаскова информираше дека досегашните резултати и потенцијалот на локалитетот ја наметнуваат потребата истражувањата на Расница да продолжат како систематски археолошки истражувања, со долгорочна научна програма и соодветен третман на откриениот материјал.
Раководителот на проектот, д-р Перо Арџанлиев, го претстави археолошкиот контекст и значењето на новото откритие. Тој посочи дека станува збор за гроб со исклучително богата и комплетна војничка опрема и дека, според карактеристиките на откриениот материјал и првичната хронолошка анализа, погребувањето е постаро од наодот откриен во 2024 година. Новите сознанија овозможуваат попрецизно согледување на развојот на некрополата, погребните обичаи и статусот на лицата погребувани на овој простор во текот на архајскиот период.
На прес-конференцијата, директорката на Управата за заштита на културното наследство ја информираше јавноста дека Управата, согласно своите надлежности, ќе иницира Информација до Владата, со цел да се обезбеди континуитет и соодветно финансирање на понатамошните археолошки истражувања, заштитата и стручниот третман на локалитетот и наодите.
Поддршка за продолжување на истражувањата изрази и градоначалникот на Општина Струга, нагласувајќи го значењето на откритието и за локалната заедница, како и подготвеноста на Општината да даде поддршка во рамките на своите можности и надлежности.
Директорот на НУ Завод и музеј – Охрид, институција партнер во истражувањата, ја истакна максималната стручна и институционална поддршка за проектот. Новите резултати од Корошишта отвораат исклучително важни прашања за археологијата на Охридско-струшкиот регион и за неговото место во пошироките процеси на Балканот во архајскиот период, особено во однос на веќе познатите богати погребни комплекси од регионот, меѓу кои централно место зазема Требенишката некропола.
Откритието од 2026 година се надоврзува на резултатите од 2024 година, кога на Расница беше истражена монументална гробна целина со исклучително богат инвентар. Новиот гроб со комплетна војничка опрема покажува дека не станува збор за изолиран наод, туку за археолошки комплекс со извонреден научен потенцијал.
Со продолжувањето на истражувањата, Расница кај Корошишта се наметнува како еден од клучните локалитети за идното проучување на архајскиот период во Македонија и поширокиот регион, а откриените целини допрва ќе бидат предмет на детални археолошки, конзерваторски и интердисциплинарни анализи.