Македонија

Поскапиот долар и повисоките камати лоша вест за македонската економија

За Македонија тоа би можело да создаде притисок врз цените на горивата и врз трошоците на фирмите, но и да го поскапи новото задолжување на државата во странство.

Претставници на Федералните резерви на САД (ФЕД) на последниот состанок оценија дека постои растечки ризик од потреба од дополнително затегнување на монетарната политика со цел да се ограничи инфлацијата, пренесе Плусинфо. Одредени членови на ФЕД проценија дека во случај на неповолни податоци за растот на цените, можеби ќе биде потребно дури и зголемување на каматните стапки за половина процентен поен до 4,5%.

Речиси сите учесници на состанокот веруваа дека, доколку економските случувања се одвиваат во согласност со нивните очекувања, ќе бидат потребни понатамошни зголемувања на каматните стапки, додека неколку претставници предупредија дека инфлацијата може да се покаже како поупорна од очекуваното и да бара порестриктивна монетарна политика. Во октомври ФЕД одлучи да ја задржи референтната каматна стапка во опсег од 3,75 до 4%.

Гувернерката Лиза Кук и претседателката на Федералните резерви на Кливленд, Бет Хамок, беа единствените што формално се спротивставија на одлуката, залагајќи се за зголемување на стапката од 0,25 проценти.

Неколку функционери кои ја поддржаа одлуката за задржување на каматните стапки изјавија дека одлуката е тесна, додека поширока група учесници на состанокот инсистираше централната банка јасно да стави до знаење дека паузата во зголемувањето на каматните стапки не значи слабеење на нејзината посветеност за достигнување на целната инфлација од два проценти.

Инфлацијата во САД продолжува да се движи над 3% годишно, со мали знаци на забавување во последните месеци. Функционерите на ФЕД се особено загрижени за ширењето на зголемувањето на цените од енергијата кон другите сектори на економијата, вклучувајќи ги и услугите, како и за можноста бизнисите сè повеќе да ги префрлаат зголемените трошоци на потрошувачите.

Записникот, исто така, покажа дека функционерите почнаа подетално да го разгледуваат влијанието на развојот на вештачката интелигенција врз инфлацијата, вклучувајќи ги ризиците од прекумерни инвестиции во оваа технологија, но и можноста таа да придонесе за ублажување на инфлациските притисоци преку раст на продуктивноста. Објавувањето на записникот доаѓа пред следниот состанок на ФЕД, закажан за 8 и 9 декември, каде што би можела да се одржи поинтензивна дискусија за понатамошно зголемување на каматните стапки.

Гувернерот на Фед, Кристофер Волер, денеска изјави дека централната банка треба да размисли за зголемување на каматните стапки за половина процентен поен во декември или појасно да објави побрзо темпо на нивниот раст во текот на 2027 година. Тој предупреди дека инфлацијата се шири на сè поголем број производи и услуги и дека компаниите би можеле да почнат да размислуваат за зголемување на цените од околу 3% нормално, што би го отежнало враќањето на целното ниво.

Кога во САД растат каматите, тоа може да се почувствува и во светската економија. Причината е што доларот има клучна улога во светската трговија и задолжување. Повисоките камати ги прават вложувањата во САД попривлечни, па други држави и компании можат да се соочат со поскапи кредити. Посилен долар може да значи и поскап увоз на нафта и на други суровини што се плаќаат во американската валута.

За Македонија тоа би можело да создаде притисок врз цените на горивата и врз трошоците на фирмите, но и да го поскапи новото задолжување на државата во странство.

Затоа одлуките на Федералните резерви внимателно се следат низ целиот свет. Американската централна банка се обидува да ја заузда инфлацијата, но ако каматите останат високи подолго време, поскапите кредити можат да ги забават инвестициите, потрошувачката и економскиот раст.

Најнови вести од: Македонија

Мицкоски во Берлин на собир на ,,Коалицијата на волните”

Премиерот Христијан Мицкоски, заедно со министерот за надворешни работи и надворешна трговија Тимчо Муцунски, денеска во Берлин учествуваше на состанокот на Коалицијата на волните посветен на актуелната состојба во Украина и напорите за постигнување мир

To top