Утрово одекна училишното ѕвонче и радосно ги повика малите карпошани, кои годинава прв пат седнуваат во училишните клупи. Оваа учебна година, 670 првачиња од општина Карпош го започнуваат своето големо образовно патување во десетте основни училишта низ Карпош. По тој повод, градоначалникот Сотир Лукровски, беше дел од приредбата за добредојде на првачињата во ООУ ,,Вера Циривири Трена”. Во оваа пригода, Лукровски ги поздрави малите основци и им посака успешна учебна година.
– „Ми претставува особена чест што денеска меѓу нас е и потомокот на хероината Вера Циривири – Трена, кој пак има свој внук кој е ученик во ова основно училиште. За да им го разубавиме првиот училишен ден и да им дадеме дополнителна поддршка на почетокот на нивното образование, на секое прваче му следува бесплатно ранче со основен прибор за работа. Нека ранчето биде исполнето не само со книги и училишен прибор, туку и со љубопитност, знаење, пријателства, насмевки и убави спомени. Драги првачиња, ви посакуваме среќен почеток, многу петки, нови другарчиња и училишни денови исполнети со радост“ – порача првиот човек на Општината.
Секое училиште со пригодна приредба ги пречека своите нови другарчиња, кои од оваа година ќе се запознаат со новите предизвици и ќе стекнат нови навики и обврски. Имено, во новата учебна година Општината обезбеди бесплатни ранчиња со основен прибор за работа на првачињата, како дел од Програмата за образование при Секторот за дејности од јавен интерес.
Со оваа поддршка, Општина Карпош сака да им го олесни почетокот на првачињата и нивните семејства, но и да испрати јасна порака дека вложувањето во најмладите и во нивното образование е еден од најважните приоритети. Општина Карпош и оваа година се грижи за најмладите жители и нивниот безгрижен почеток на образовниот пат. Среќен прв училишен ден, првачиња. Нека секој нов ден биде нова страница исполнета со знаење, љубопитност и убави спомени.