Денеска имав можност да се сретнам со претставници на Здружението за заштита на животни „Анима Мунди“, новинарката Мери Јордановска, Ирена Ристиќ и волонтери од Скопје, сподели на социјалните мрежи Орце Ѓорѓиевски, кандидат за градоначалник на Град Скопје.
„Дискутиравме за клучно прашање што бара целосна посветеност кон заедницата – хуман пристап во решавањето на проблемот со бездомните животни, што истовремено ќе ја подобри безбедноста на граѓаните во Скопје. Заеднички се согласивме дека со вистински политики и искрена заложба можеме да создадеме град во кој животните ќе бидат згрижени и заштитени, а не запоставени. Скопје заслужува да го реши ова прашање од хуманитарен, здравствен, безбедносен и економски аспект.
На средбата разменивме предлози за подобрување на условите во прифатилиштата, за контрола на популацијата на бездомни животни преку стерилизација и чипирање, промовирање на вдомувањето, како и едукација на граѓаните за одговорно сопствеништво. Уверен сум дека заеднички можеме да изградиме Скопје што ќе биде пример за хуманост – град каде граѓаните ќе се чувствуваат безбедно, а секое животно ќе има достоинствен живот. Ајде да создадеме иднина во која грижата, емпатијата и одговорноста ќе бидат основата на нашата заедница“, напиша Ѓорѓиевски.